我照蔡進發講的，隔轉工透早就騎車去廟後壁。
廟後壁彼條巷仔真狹，兩爿是舊瓦厝的後尾間，摩托車騎入去愛閃電火柱。鐵工廠徛佇巷仔底，鐵捲門拉一半，內底暗暗，只有一葩焊接的白光一目一目閃，配著滋滋的聲。火星像蠓仔按呢對塗跤噴，噴到我的鞋頭邊又隨熄去。空氣內底有一種鐵鉎的鹹味，閣有電火燒過的臭火焦。門邊倚一排做一半的鐵件，看形是神轎的骨，龍柱的枝椏彎甲真幼路，一枝一枝排咧，像一排無肉的手骨。
我徛佇門外喊：「有人佇咧無？」
白光停落來。一个人捽開面罩，就是頭七彼暝彼个人。灰色的工作衫，手腕頂有幾若條舊疤，面色烏烏，目睭卻真金。伊看我一目，就恬恬共焊槍囥落，手套褪一手，行過來共鐵捲門閣搝懸一屑仔。
「里長叫我來的。」我先講明。
「我知。」伊講，「昨昏伊就摃電話予我矣。」
原來蔡進發早就替我鋪好路。我這幾工才學會，這个庄頭無一件代誌是家己走到你面前的，攏是有人先替你排。你若毋知影是誰替你排的，你就永遠毋知影你欠的是誰。
伊叫我坐一塊鐵管頂，家己蹲佇對面，點一支菸，無隨開喙。工廠內底規四界攏是工具，鉎甲紅記記的鐵鎚、鉸仔、一台舊車床，壁頂掛一頂舊的關聖帝君香火袋，予煙燻甲烏烏。我等袂牢。
「彼本簿仔，是你提予我的。」
「著。」
「你哪會有？」
「恁阿爸舊年年尾提予我。」伊吐一口煙，煙對鐵捲門的縫溜出去，「講伊身體無好矣，若是伊先行，這本愛交你，毋通經過別人的手。」伊斡頭看我，「你看了了矣乎？連恁陳家彼頁嘛看矣。」
我無應。彼頁倒手爿空空，正手爿密密。
「你當做是恁陳家做規條街的債主。」義仔笑一聲，笑內底無歡喜，「毋是。彼本簿仔記的攏是別人，賰恁陳家彼頁，記的是別項物件。」
「按呢是啥？」
伊無應我，倒轉去講別項。伊講伊佮我阿爸十四歲就相捌，做伙去廟裡扛神轎，做伙予外庄的拚甲頭破血流。「彼陣的少年人無別項好爭，就是爭一口氣。過爐的時，兩庄的陣頭相閃身，目睭相對就會使摃起來。」義仔的手比一比家己的後頸，「你阿爸拳頭上勇，毋過伊上驚代誌鬧大，逐擺攏是伊共我搝轉來。我這條命，予伊搝過幾若擺。後來換我搝伊。」
「換你搝伊？」
義仔無應這句。伊共菸捻熄佇塗跤，用鞋底輾一輾，過一睏才閣開喙，卻是講另外一件舊代誌。伊講民國七十幾年彼擺大水，圳溝滿出來，規條老街攏浸佇水內底，恁陳家一樓的神明桌浮起來，愛人潛落去搬。「彼工是我落去的。」伊講，「水淹到胸坎，我摸甲恁公媽的爐，捀甲頭殼頂，一步一步行出來。恁阿爸佇騎樓頂共我拖起來，兩个人規身軀全全塗糜，笑甲若戇的。」
伊講到遮，喙角有一屑仔笑，隨又收轉去。「彼陣我感覺，這世人替陳家做啥物攏甘願。」伊停一下，「後來就毋是遮爾簡單矣。」
我想起彼本簿仔。棉被店彼頁的正手爿，有一行寫著「某年大水，義仔潛落淹水的地下室，替陳家搬出神明桌，水淹到胸坎」。彼陣我看毋出彼行字的重量，這馬坐佇伊面前，才知影一行字後壁囥的是一世人。義仔家己彼頁是空的，別人的帳內底煞規四界攏是伊。這款人替規條街做甲遮爾濟，煞無一頁是記予伊的。
「後來伊做爐主，你哪會攏徛佇後壁？」我問，「換帖兄弟，年節嘛毋捌來阮兜。里長講你，講你欠規庄頭人情你毋討，恁陳家欠你情義你嘛毋討。這款人，哪會佮家己上好的兄弟離上遠？」
「有一寡兄弟，愈近煞愈袂當相見。」伊講，「你這馬袂了解。」
我感覺話又欲斷佇這，就趕緊講起長昱。我共林經理的名片、彼張試算表、四十二坪分三戶的條件，一項一項講予伊聽。我講條件開甲真好，好甲我這个做建築的家己嘛算袂出比伊較好的。我閣講，昨昏我聽文祥講，老街尾已經有兩戶偷偷仔共同意書簽落去矣，其中一戶是開棉被店的。「長昱講年底容積的辦法欲改，過年就無這个數字。逐个人攏咧算，賰我猶未算清楚。」
我講事務所彼爿咧催我，合夥人昨昏閣摃電話來，講審查會議袂當閣延，語氣客氣客氣，客氣甲我聽會出後壁彼句「你若閣無轉來就麻煩矣」。我講我本底想的是共厝賣賣咧轉去台北，共阮媽安頓佇較清幽的所在，逢年過節轉來拜拜就好。我講這幾工市場無人欲賣菜予阮，阮媽逐工騎車去隔壁鎮買，來回三十公里，我看甲心肝真艱苦。「我若共這間厝賣掉，這款代誌就攏無矣。」我講。
我一講「賣」，義仔的面色就沉落去。
「你欲賣？」伊問，聲無懸，卻親像有一塊鐵硬硬硬。
「我人佇台北。」我講，「里長講愛揣人替我出面擋長昱，我來，是想欲請你鬥相共。毋過講實在的，義仔，若是條件真正遮爾好，逐家攏欲簽，我一戶咧擋，是欲擋予啥人看？」
「你先莫講擋。」義仔徛起來，行到門邊，看外口彼條狹巷，「你連地跤下有啥物攏毋知，你欲擋啥？你若明仔載共同意書簽落去，過三個月機器一入來，共廟埕東爿彼塊地挖落去，你就知影你賣的毋是一間厝。」
「你講清楚。」我嘛徛起來，「地跤下到底有啥物？我阿爸畫一塊地寫『不動』兩字，阮媽講下跤有物件，里長講你是規庄頭賰一个會使講予我聽的人。逐个人攏共我踅來踅去，賰你會使講。你若閣共我講『時到你就知』，我明仔載就轉台北。」
義仔恬去足久。鐵工廠內底靜甲，我聽會著外口舊圳溝的水聲，涓涓仔，像有人細細聲仔咧念經。伊斡過來，看我看甲真久，久甲我感覺伊咧共我這个人量寸尺，量看我這款台北轉來的後生擔會起抑擔袂起。
「你阿爸交代我，時到才共你講。」伊終其尾開喙，「毋過伊嘛交代我一句：若是這个囡仔欲賣，就愛佇伊簽名進前，共真相講予伊聽。伊講，伊寧可予後生罵，嘛毋通予後生毋知影家己踏著啥物。」
「彼就這馬講。」
義仔行倒轉去，共焊槍捀起來，手指按過烏烏的槍喙，卻無點著。伊看彼支槍，無看我。伊的手咧顫，一个做鐵二三十冬、手骨遮爾粗的人，手竟然咧顫。
「你阿爸擋六年前彼件都更，毋是為錢。」伊講，「是為著我。」
伊斡過來看我，目睭內底彼種物件，我這世人毋捌佇任何人的面頂看過。毋是驚，毋是見笑，是一種扛傷久、扛甲欲共骨頭壓斷的疲勞。
「彼塊地跤下的物件，」伊停一下，聲細甲若像驚共家己嚇著，「是我囥的。是我一手囥落去的。恁阿爸鬥我做煞，鬥我囥予好勢，鬥我瞞規庄頭瞞二十八冬。」
伊共焊槍囥落，鐵佮鐵相碰，硞一聲，佇彼間暗暗的工廠內底彈來彈去，久久袂散。
「你若欲聽，我就對頭講予你聽。」義仔講，「毋過你聽了，你就佮我仝款，一世人袂當講。你想予清楚才轉來。」